المسابقة العربية لأقبح صورة

كنت في يوم من الأيام أكتب في واحد من المنتديات اللي ياكثرها وأكثر من الهم على القلب ، واحد من المنتديات اللي الجماعة اللي مأسسينه مايدرون وين الله قاطهم ، مو مشكلة ، اغلبنا ما ندري وان الله قاطنا ، طبعا ، احنا العالم الثالث ، مش أي أي ولا زي زي ، مشكلة المنتدى بكل بساطة انهم يدعون توجه فكري محدد ، بس المشكلة وين ؟ المشكلة ان اغلب تصرفاتهم واطروحاتهم ومطالباتهم تناقض التوجه الفكري الأساسي اللي يدعون انتمائهم له ، وبالتالي اعطوا اشوه صوره لهذا الفكر ، واهو الفكر الليبرالي .

طيب ، خلصنا من هالمنتدى ، نروح منتدى ثاني يدعي الديمقراطية ، شنو ميزة الديمقراطية ؟ ميزتها ان اللي بيتكلم يقول رايه بكل حريه طالما انه ما تعدى على الآخرين ، ولكن ، ماهي سياسة هذا المنتدى الديمقراطي ؟ ميزته سياسة تكميم الأفواه ، طيب وين المبادئ الديمقراطية ؟ طلها طاف .

ماعلينا ، شويه يهال وتعلمو كلمتين واخترعو من نفسهم حسبالهم مثقفين خلهم ياخذون راحتهم ، هل وقفت المشكلة عند هذا الحد ؟ طبعا لأ مع الأسف ، شوفو الإنتخابات والمفاتيح الإنتخابية في المنتديات ، وشوفو طريقة طرحهم وردودهم على أي شخص يتكلم عن المرشح الفلاني أو العلاني ، طريقة الردود والتعامل اتدل على مصطلح واحد .. أوكي مصطلحين اثنين ، الأول : دفاشة ، والثاني : همجية .

من المفترض ان كل شخص يلمع صورة مرشح انه يحبب الناس بهالمرشح بدل ما يخليهم يكشون منه ، يعني على الأقل يطبقون الآية (( جادلهم بالتي هي أحسن )) ، على الأقل لأنهم يتكلمون بإسم مرشح ، بس تبون الصج ؟ اذا المرشح نفسه اطروحاته الله بالخير ، اللي يتحدى القانون أشكره ، واللي ينادي بأفكار لا منطقيه ولا عقلانية ، والمشكله انه تقول شاوي وياكثر الغنم اللي يمشون وراه ، يعني من الصعب انك تلقى مرشح عنده مبادئ ، والغريب انه فعلا مو محتاج مبادئ ، بس محتاج مواضع يدلدغ فيها مشاعر الناخبين .

خلونا من المرشحين والإنتخابات والمنتديات ، شوفونا احنا كعرب ، وشوفو الصورة اللي نعطيها لأنفسنا لغير العرب ، طبعا أكيد الصورة قمة بالتشويه ، تبون الصج ؟ والله مادري حدي احترت ، هل هي فعلا صورة مشوهة ولا اهي الصورة الحقيقة ؟ مو مهم ، المهم انها بكل تأكيد ، أقبح صورة ممكن يشوفنا فيها الآخرين . ومع كل أسف ، مهما كانو هؤلاء الآخرين ، سواء ممن يخالفونا الرأي ، أو يخالفوننا الدين ، أو يخالوننا الجنس والعرق ، ليس ذلك مهما ، المهم أن نعطي الصورة القبيحة لأنفسنا .