ضمير للبيع لأعلى سعر

يا جماعة لحقو علي تره ضميري للبيع على السوم ، لما الحين واصل السوم بعشرتعش دينار ، المهم مو هذا الموضوع ، الموضوع يا جماعة اهو : هل اللي ما يشتري اصوات اشرف من اللي يشتري أصوات ؟ هل اللي مايبيع صوته أشرف من اللي يدلي بصوته لتوجهات قبلية أو طائفية أو عائلية ؟ انا برايي انك تشرب كتشب صرف من البطل وبعدين تبلع البطاط ، عادي راح يختلط بالمعده ، والحال من بعضه ، الإثم اهو إثم ، بغض النظر عن ماهيته ، يعني إثم الزنا ما يفرق عن إثم السرقة ، أثنينهم يدخلون النار ، امس دار بيني وبين الحبايب هالحوار وهالسؤال ، في شخص يشتري اصوات ( من غير ذكر أسماء ) ودخل المجلس ، على حسب قناعتي انا ما شفت عليه أي شي ، مواقفه وطنيه وطرحه متزن ويحارب سرقة المال العام والمال هالسنة بعد ، بس ، كان يشتري اصوات ، مو عيب عليك ياجليل الحيا ياللي ماتستحي على ويهك ؟

زين ، هذا خلصنا منه ، والثاني ؟ وطني قح ، له باع طويل بالمجلس وعروقه بالماي ، واهو من أكبرها وأسمنها بالمجلس اللي طاف والمجالس السابقة ومواقفه وطنية ومشرفة ، بس .. طلعت عليه علامة استفهام على سالفة دوة وفحم ومادري شنو ، انزين ، في هالحالة منو أشرف من الثاني ؟ اللي دخل المجلس عن طريق شراء الأصوات ؟ ولا اللي دخل المجلس واستفاد ؟

انا أعتقد والله أعلم ان مافي احد شريف ، وكله محصل بعضه ، انا أقول كل واحد يقعد في بيتهم وايد ابرك ، اشتسوه علينا نروح انرشح ناس تستفيد من وجودها بالمجلس واحنا نكرف بهالديره ؟

بس احلى شي ان الرد جاهز حق اللي تفكيرهم نفس تفكيري ، لازم نشرح واحد يوصل صوتنا حق الحكومة .. هاآو ، على مين يابا ؟ لي متى نقص على روحنا ؟ انا اقول .. استفيدو منهم قبل لا يستفيدون منكم ببلاش ، تره كلهم مافيهم خير ، واذا مو مصدقيني ، قولولي وين الخير اللي طلع منهم ؟